Monday, May 7, 2012

ကိုကျော်သူ နှင့် မရွှေဇီးကွက် ၏ တွေ့ဆုံပွဲ (Los Angeles)






သတင်း နှင့် ဓါတ်ပုံ - မျိုးချစ်မြန်မာ


" မီးအိမ်လေးတွေအတွက် "

နာရေးကူညီမှုအသင်း ရဲ့ ဦးဆောင်နေသူများဖြစ်တဲ့ ရုပ်ရှင်သရုပ်ဆောင် ကိုကျော်သူ နဲ့ ဇနီးဖြစ်သူ မရွှေဇီးကွက် တို့ ရဲ့ America လူထုတွေ့ဆုံရေး ခရီးစဉ် မှာ ပထမ ဦးဆုံးဖြစ်တဲ့ California ပြည်နယ် Los Angeles မြို့က ၂၀၁၂ ခုနှစ် မေလ ၅ ရက်နေ့ ညနေခင်းလေးကို သွားရောက် မှတ်တမ်းတင်ဖြစ်ခဲ့ပါတယ်။

ထင်မှတ်ထားတာထက် ပိုမိုနေခဲ့တဲ့ မြန်မာ များစွာ ကို တွေ့ရှိခဲ့ရတဲ့အတွက်လဲ လွန်စွာ ဝမ်းမြောက် ပီတိ ဖြစ်ခဲ့ရပါတယ်။
သတ်မှတ်ထားတဲ့ အချိန်ပိုင်းအတွင်းမှာ စတင်ဖြစ်ခဲ့ပေမယ့် အကြောင်းများစွာတို့ကြောင့် မူရင်း အစီအစဉ်အတိုင်း နာရေးကူညီမှု အသင်းရဲ့ ဗီဒီယို မှတ်တမ်းကို ပြသနိုင်ချိန်မရခဲ့တာကြောင့် ကိုကျော်သူ နဲ့ တာဝန်ရှိသူများက ထိုအခွေကို ပြန်လည်ဝေမျှပေးမယ် ဆိုတာနဲ့ဘဲ နိဂုံးချုပ်ဖြစ်သွားခဲ့ပါတယ်။

ကျွန်တော် ကတော့ ဒီပွဲကို နိုင်ငံခြားရောက်နေတဲ့ မြန်မာ တစ်ဦး အနေနဲ့ သွားရောက်ခဲ့တာ မဟုတ်သလို သတင်းသမားတစ်ယောက် ဘလော့ဂါ တစ်ယောက်အနေနဲ့လဲ သွားရောက်ခဲ့တာ မဟုတ်တဲ့ အတွက် ကျွန်တော် ချစ်တဲ့ အကိုကြီး ( ဦးမောင် ) ကိုကျော်သူ နဲ့ ( မကြီး ) မရွှေဇီးကွက် တို့ ရဲ့ မိတ်ဆွေ အနေနဲ့ဘဲ သွားရောက် ခဲ့ပေမယ့် ဝါသနာအရတော့ ဓါတ်ပုံမှတ်တမ်းလေး ရေးသားရိုက်ကူးဖြစ်ခဲ့ပါတယ်။

မှန်တာပြောရရင် ကျွန်တော် မကြီး နဲ့ ဦးမောင် ပွဲတွေ တကယ် စတွေ့ရင် ဖျော်ဖြေပွဲ မဟုတ်ရင် မလာချင်ကြတဲ့ ဒီက မြန်မာတွေရဲ့ အမိမြေပေါ်စိတ်ဝင်စားမှု အပေါ် စိတ်ဓါတ်များကျသွားမလားဆိုတာ စိုးရိမ်နေခဲ့မိပါတယ်။
သူတို့ကိုတော့ ကျွန်တော် ဘာမှ ကြိုတင်ထင်မြင်ချက် မပေးခဲ့ပါဘူး။
ဒါပေမယ့် ထင်မှတ်မထားဘဲ မြန်မာ များစွာ လာရောက်ခဲ့တာကို မြင်ရတဲ့အခါမှာ ကျွန်တော် အမေရိကား မှာ နေနေရတဲ့ မြန်မာ တစ်ယောက် အဖြစ် နဲ့ ပထမ ဆုံး အကြိမ် ဂုဏ်ယူမိခဲ့ပါတယ်။
နောက်ပြီး ကျွန်တော် ချစ်တဲ့ အကို နဲ့ အမ မှာ ကျွန်တော့်လိုဘဲ သူတို့ကို လေးစားတဲ့သူတွေ မနည်းပါလားဆိုတာကို သက်ဝင်ယုံကြည်သွားမိသလို ပီတိလဲ ဖြစ်မိပါတယ်။

ဒီ လင်မယားဟာ ဘယ် UN အစည်းအဝေး ဘယ် White House Media တွေ မှာမှ အကျယ်တဝင့်ဖေါ်ပြခြင်း မခံခဲ့ရတာတင်မဟုတ်ဘဲ သူတို့ နေထိုင်နေရတဲ့ မြန်မာပြည် အစိုးရရဲ့ တရားဝင် လေးစားအသိအမှတ်ပြုခြင်း ဆိုတာကိုတောင် မခံခဲ့ရတဲ့သူတွေပါ။

ဒါပေမယ့် သူတို့ ပေးဆပ်ခဲ့တဲ့ သမိုင်းဟာ ကျွန်တော်တို့ အားလုံးရဲ့ လေးစားအားထားရာ လူထုခေါင်းဆောင် ဒေါ်အောင်ဆန်းစုကြည် ထက်မသာရင်သာနေမယ် များစွာ မလျော့နည်းခဲ့ပါဘူး။

ဟုတ်ကဲ့ ...

အမေစု လို သူတို့ အိမ်တွင်းချုပ် ထောင်နှစ်ရှည် မကျဖူးပါဘူး လို ငြင်းဆိုလာသူတွေကို ...

အမေစု လဲ သူတို့လို မုန်တိုင်းကြောင့် ရေမြေပေါ်မှာ ပုတ်ပွပေါ် နေတဲ့ အလောင်းတွေ ...
HIV ကြောင့်သေသွားတဲ့ အလောင်းတွေ ...
ရုပ်ပျက်ဆင်းပျက် သေကြေပျက်ဆီး သွားခဲ့သူတွေရဲ့အလောင်းတွေ ...
ကိုယ်ရောလက်ပါ ကိုင်တွယ်ထိတွေ့ ရတဲ့ အခြေအနေတွေကို မကြုံဖူးသေးပါဘူးလို့ ကျွန်တော် အမြဲ ခုခံ ငြင်းဆိုပေးခဲ့ဖူးပါတယ်။

ကျေးဇူးပြုပြီး ကျွန်တော် ဆိုလိုတာကို နားလည်ပေးကြပါခင်ဗျာ။

သူတို့ ရဲ့ တိုင်းပြည်နဲ့ လူမျိုးအပေါ် ထားရှိတဲ့ စေတနာ ကြောင့် ပေးဆပ်မှုဟာ အမေစု ထက် ပိုသာမနေရင်တောင် အရမ်းကြီးတော့ မကွာခြားခဲ့ပါဘူး။

ဒါပေမယ့် အမေစုကို ပြည်တွင်း ပြည်ပ နိုင်ငံရေး အဖွဲ့အစည်းတိုင်းက ကျောထောက်နောက်ခံ ခိုင်မာစွာ ပြုထားပေးသလို ..
အမေစု ရဲ့ ဆန္ဒ တွေအတွက် ပြည်တွင်း ပြည်ပ နိုင်ငံရေး အဖွဲ့အစည်းတွေက ဖြည့်ဆည်းပေးနေသလို ...
ကျွန်တော့် အကို နဲ့ အမ ကို ဘယ်သူတွေကမှ မပံ့ပိုးပေးခဲ့သေးပါဘူး။

အောင်ဆန်းစုကြည်လို့ CNN မှာ ပါလာရင် တစ်ကမ္ဘာလုံး သိကောင်းသိမယ်။
ကျော်သူ ရွှေဇီးကွက် ဆိုရင် မြန်မာတစ်ချို့တွေဘဲ သိကြပါသေးတယ်။
မြန်မာ ကလေးတွေ ထဲမှာတောင် မသိကြသေးတာ အများကြီးရှိပါသေးတယ်။

ဒီတော့ ကျွန်တော် ခု ဒီကနေ တိုက်တွန်းလိုပါတယ်။

ကုသိုလ်ကောင်းမှုဆိုတာ ရင်ထဲက စစ်မှန်တဲ့ စေတနာ နဲ့ သဒ္ဒါ တရားပေါ်မှာတည်တာပါ။
ကျော်ကြား ထင်ရှား လူသိများ စရာ မလိုပါဘူး။

ဒီတော့ ..


မြန်မာပြည်ရဲ့ ..


အနိမ့်ကျဆုံး လူတန်းစားတွေအတွက် ...
အလိုအပ်ဆုံး အရာတွေကို ..
အနစ်နာခံရင်း ဖြည့်ဆည်းပေးနေတဲ့ ...
မြင့်မြတ်တဲ့ လူသားမောင်နှံနှစ်ဦး ဟာ ...
မိတ်ဆွေတို့ ရဲ့ လက်တစ်ကမ်းအကွာကို ...
ကြီးမြတ်သော ဘုရားရှင်အားလုံးတို့ ရဲ့ အလိုတော် အတိုင်း ...
ဆိုက်မြိုက်စွာ ရောက်ရှိလာခဲ့ကြပါပြီ။


သင်တို့ရဲ့ နှလုံးသားတွေထဲမှာ ..
မွေးဖွားလာချိန်ကထဲက ..
ခုချိန်ထိ ရှိနေဆဲဖြစ်တဲ့ ...
မေတ္တာတရား ဆိုတဲ့ တန်ခိုးတော် ... နဲ့ 
လူသားချင်း စာနာစိတ် .. ဆိုတဲ့ အသိဥာဏ် ကို ..
တွဲဖက် အသုံးပြုပြီး ..


မြန်မာပြည်က ..


ကံမကောင်း ဆုတောင်းမလှခဲ့တဲ့ ..
လူသားတွေ ..
ကလေးငယ်တွေ ..
မိခင်တွေ .. အားလုံး အတွက် ...
မျှော်လင့်ခြင်း မီးအိမ်လေး တွေကို ..
ဒီ ဇနီးမောင်နှံကနေတဆင့် ..
ချစ်ခြင်း နဲ့ ထွန်းညှိပေးလိုက်ကြပါလို့ ...

ကျွန်တော် လေးစားစွာ ရပ်ခံ တိုက်တွန်း လိုက်ပါတယ်။

...........


ထာဝရမေတ္တာဖြင့်


မျိုးချစ်မြန်မာ


Click HERE to view this article on my FaceBook Page.

0 comments: